Arkivoli i ish-kryeministrit italian, Silvio Berlusconi, i cili humbi jetën mëngjesin e së hënës (12 qershor) ndodhet në rezidencën e tij në Villa San Martino, në Arcore.

Arkivoli i 86-vjeçarit, që vdiq në spitalin San Raffaele në Milano, u dërgua në rezidencë mesditën e djeshme, në pritje të varrimit shtetëror të planifikuar të mërkurën në orën 15:00 në Katedralen e Milanos.

E mërkura është shpallur ditë zie kombëtare, hera e parë që ndodh për një ish-kryeministër.

Sot ishte planifikuar të mbaheshin homazhe edhe në kompaninë Mediaset, por u anuluan. Djali i ish-kryeministrit të ndjerë iu është drejtuar me një letër stafit ku shprehet se “Berlusconi ishte gjithmonë krenar për ju”.

FAMIGLIA BERLUSCONI AL RISTORANTE ‘PUNNI’ DI PORTOFINO, DA SX BERLUSCONI SILVIO, TOFFANIN SILVIA E BERLUSCONI PIERSILVIO (Piccarreta / GIACOMINOFOTO, PORTOFINO – 2006-10-08) p.s. la foto e’ utilizzabile nel rispetto del contesto in cui e’ stata scattata, e senza intento diffamatorio del decoro delle persone rappresentate

“I dashur Mediaset, ndjej nevojën t’ju shkruaj sepse e di se sa e rëndësishme ishte për babain tim t’ju tregonte dashurinë dhe krenarinë e madhe që ka ndjerë gjithmonë për kompaninë tonë dhe për të gjithë ne”, me këto fjalë iu është drejtuar punonjësve të medias italiane, CEO i Mediaset Pier Silvio Berlusconi, 24 orë pas vdekjes së babait të tij.

“Nuk ka fjalë për të përshkruar emocionin tim sa herë që më thoshte “Unë jam krenar për ty dhe për atë që ti bën’. Dhe unë gjithmonë e kam ditur shumë mirë se ai na drejtohej të gjithëve. Sepse i vetëm unë nuk mund të kisha bërë asgjë. Asgjë. Ai ishte një njeri që dha aq shumë, aq shumë. Gjithmonë e ka konsideruar kompaninë tonë si krijesën e tij të dashur. Babai im, themeluesi ynë, ju ka dashur gjithmonë të gjithëve”, shtoi ai.

Lule, flamuj të Forza Italia dhe shallë të AC Milan, dhjetëra dhurata e kujtime u lanë përpara vilës historike në Arcore.

Një banderolë e madhe me fjalët ‘Faleminderit përgjithmonë president’ u shfaq mëngjesin e sotëm në një gardh përgjatë vilës, i nënshkruar nga tifozët e klubit të futbollit Monza.