Dionis Myrtollari, i cili dyshohet se ka ngacmuar djalin e Ativie Qazimllari me probleme të shëndetit mendor, ka reaguar së fundmi për mediat.

Në deklaratën e tij, ai është shprehur se nuk pranon asnjë akuzë të bërë nga nëna e djalit, ndërsa thotë se policia duhet të hetojë çdo gjë.

40-vjeçari shprehet se i është dëmtuar imazhi, ndërsa thekson se fëmijët e tij kanë frikë të dalin nga shtëpia pasi familja Qazimllari i godet me gurë.

“Nuk pranoj asnjë prej akuzave, komshinjtë e mi kanë probleme mendore; jam gati të vijë policia dhe të hetojë gjithçka. Në rast se vërtetohet edhe gjëja më e vogël, mund të më varni në mes të fshatit. Më është dëmtuar imazhi, jam babai i tre fëmijëve që kanë frikë të dalin nga shtëpia sepse ajo familje i godet me gurë. Turp për policinë e cila nuk merr masa dhe dëmton imazhin e një njeriu të thjeshtë si unë”, thotë 40-vjeçari.

Në mbrojtje të tij kanë dalë banorët e fshatit.

“Dionisi është një djalë i mirë, nuk është fare problematik dhe nuk ka bërë asgjë nga këto që thotë ajo familja. Ajo familje është e shkatërruar dhe me probleme mendore. Kërkojmë që të zbardhjet ngjarja, për këtë arsye jemi të gjithë këtu në mbështetje të Dionisit”– shprehen ata.

Ishte Ativie Qazimllari, e cila akuzoi komshiun e saj se ky i fundit ka rrahur dhe abuzuar seksualisht me djalin e saj me probleme të shëndetit mendor.

Për mediat ajo tha se 40-vjeçari, në mënyrë periodike, ka ushtruar dhunë fizike dhe verbale ndaj tyre.