Juventusi dhe Lacio janë shumë pranë arritjes së një marrëveshje për shkëmbimin e dy lojtarëve. Në mënyrë të papritur, lacialët janë gati të heqin dorë nga një veteran me shumë eksperiencë si Açerbi, ndërsa bardhezinjtë nga një futbollist i cili mund të sillte të ardhura të ndjeshme në arkat e tyre si Rugani.

Mediat italiane bëjnë të ditur se që kur kanë mësuar për largimin e Kielinit, te Juventusi janë vënë në lëvizje që t’i sigurojnë një element me shumë eksperiencë Alegrit. Kështu, ka lindur ideja e Açerbit dhe ky i fundit shihet si një lojtar i cili do të sillte siguri në repartin e prapavijës. Vetë Açerbi është gati të largohet nga Lacio pasi është përplasur vazhdimisht me tifozerinë e saj kohët e fundit. Ndërsa Sarri do të ishte i lumtur të kishte në shërbimet e tij Ruganin, i cili u bë i njohur pikërisht falë vitit të shkëlqyer nën urdhrat e tij te Empoli.

Palët po diskutojnë një shkëmbim direkt të kartonëve të futbollistëve, duke mos ndryshuar asgjë në bilancet financiare të klubeve të përfshira.

PANORAMASPORT.AL