Një vit pas ndarjes nga Gerard Pique, Shakira ka dhënë një intervistë për revistën “People”, ku ka zbuluar detaje të dhimbshme nga ajo periudhë e jetës së saj. Këngëtarja kolumbiane tregoi se si Pique e tradhtoi, ndërsa babai i saj ishte në terapi intensive dhe luftonte për jetën.

“Gjithçka ndodhi kaq shpejt. Shtëpia ime po shkatërrohej. Nga shtypi po mësoja se ai më kishte tradhtuar, ndërsa babai im ishte në terapi intensive”, tha Shakira.

“Njeriu që dua më shumë në jetën time, babai im, më braktisi kur kisha nevojë për të më shumë se kurrë. Unë nuk mund të flisja me të dhe ai nuk mund të më këshillonte në atë kohë”, raporton “Protothema”.

Duke folur për shërimin e babait të saj, Shakira tha se ishte “shumë e vështirë dhe e ngadaltë”. “Ai është një njeri i mrekullueshëm dhe i dashur, që na mahnit të gjithëve me forcën e tij”.

“Ai kishte pasur koronavirus, kishte pasur dy aksidente, një pneumoni dhe kishte pesë operacione – të gjitha në moshën 91-vjeçare, në më pak se gjashtë muaj. Babai im është shembulli më i madh i qëndresës dhe nëna ime ishte pranë tij ditë e natë” tha Shakira.

“Dashuria e prindërve të mi ishte një shembull për mua, por nuk pata fatin të jetoj një marrëdhënie të ngjashme. Por shpresoj që prindërit e mi të jenë model për fëmijët e mi. Dashuri, durim, përkushtim absolut dhe dëshirë për jetën”.

Diku tjetër në intervistën për “Spain’s People”, Shakira tha se është shumë e emocionuar për publikimin e këngëve të reja. “Muzika më ndihmon të kapërcej problemet e mia shpirtërore, mendore dhe fizike”.

“Kam kaluar nëpër mohim, inat, dhimbje, pranim, trishtim, shpresë, mashtrim, shpresë sërish, eksitim. Aq shumë emocione dhe ndjenja që herë pas here dukeshin të përziera, që dukeshin të paaftë për të bashkëjetuar brenda meje, të cilat arrita t’i zgjidhja vetëm përmes këngëve të mia, për të kuptuar më mirë veten. Jo për të shpjeguar apo justifikuar veten, thjesht për të kuptuar veten dhe për të toleruar veten”, tha Shakira.