Matt Dockray, në gjendje të rëndë për jetën, pasi virusi vdekjeprurës Covid-19 i ka shkatërruar mushkëritë, ka bërë një thirrje për të gjithë popullin britanik, që të dëgjojnë qeverinë dhe të qëndrojnë të mbyllur në shtëpi.

I sëmurë prej tre javësh Dockray tha se simptomat e tij filluan me një kollë të thatë më 1 mars. Pasi gjendja e tij erdhi duke u rënduar ai regjistroi një video të lamtumirës për gruan dhe fëmijën e tij dhe ‘gati u dorëzua për shkak të dhimbjes dhe frikës’.

Ai tani u ka bërë thirrje britanikëve që mund të mendojnë se janë ‘të pathyeshëm’ për të ‘mos qenë idiotë’ dhe t’u përmbahen masave të vendosura për të parandaluar përhapjen e virusit.

Në një postim në Facebook, Z. Dockray tha: “Unë kam qenë i sëmurë për tre javë, nga një kollë e lehtë ditën kur pashë futboll në Wembley më 1 mars, deri në të dridhura, ethe dhe dhimbje koke… Nga dita në ditë, ndjehesha keq por vazhdoja si një hero i vërtetë, duke injoruar çdo këshillë familjare. Mjekët më pyetën nëse kisha qenë në Kinë dhe kjo ishte e mjaftueshme për të mos pranuar COVID-19 dhe për ata të më thoshin se mund të kem një virus sezonal, duke më dhënë disa antibiotikë.”

Matt shpjegoi se si në ditët e para të sëmundjes së tij ai nuk ishte në gjendje të ngrihej nga divani dhe po mundohej të qëndronte zgjuar dhe të merrte frymë si duhet.

Britaniku i rrezikuar me jetë nga koronavirusi shtoi më tej: “Ata që më njohin mua e dinë se më pëlqejnë sfidat, dhe që nga ai moment kam luftuar me çdo frymë, me premtimin se do ja dal, do qëndroj zgjuar për ta luftuar këtë virus me gjithçka mundem.Tre ditë më vonë, unë kam filluar të stabilizohem, nuk është se jam duke u bërë shumë më mirë, thjesht se nuk po përkeqësohem”.