Panorama Plus/ Amerikanët po përballen me rritjen e inflacionit, vitin e 3 të pandemisë dhe ndalimit të abortit – por ata janë të interesuar për një çështje tjetër mbi të gjitha këto.

Sipas të dhënave nga platforma e monitorimit të medias ‘NewsWhip’, gjyqi për shpifje midis Johnny Depp dhe Amber Heard po gjeneron aktualisht më shumë angazhim në mediat sociale se çdo temë tjetër. Firma e të dhënave pretendon se drama magjepsëse në sallën e gjyqit ka grumbulluar mesatarisht 508 ndërveprime në mediat sociale – p.sh. pëlqime, komente dhe shpërndarje – për çdo artikull të publikuar gjatë muajit të kaluar.
Kjo është pothuajse pesë herë më shumë angazhim sesa artikujt që kanë të bëjnë me abortin (141 ndërveprime në mediat sociale) dhe më shumë se 10 herë më shumë angazhim sesa artikujt për COVID-19 (44 ndërveprime në mediat sociale). “Është një rekord për ne”, tha Rachel Stockman, presidente e rrjetit Law & Crime.

Ndërkohë, njerëzit në të gjithë vendin pretendojnë se janë të shqetësuar për kostot në rritje të mallrave dhe shërbimeve, por artikujt për inflacionin mbledhin mesatarisht vetëm 70 pëlqime, komente dhe shpërndarje. Lufta në Ukrainë nuk i tërheq aq shumë amerikanët, me artikuj mbi konfliktin që arrijnë të tërheqin mesatarisht 91 ndërveprime në mediat sociale.

Edhe presidenti Joe Biden nuk tërheqë të njëjtin nivel interesi si Depp dhe Heard. Lajmet e publikuara për të marrin mesatarisht 170 ndërveprime në mediat sociale.

Dhe ndërsa qindra mijëra njerëz morën pjesë në protestat kundër ndalimit të aborteve, të dhënat tregojnë se miliona më shumë amerikanë angazhohen më shumë për Amber Heard – të paktën në internet.

Në muajin e kaluar, ka pasur katër herë më shumë kërkime në Google për emrin e Heard sesa për abortin ose Gjykatën Supreme, raportoi Axios. I vetmi personazh tjetër publik që ka arritur të tërheqë të njëjtin nivel të interesit në mediat sociale si Heard në muajin e kaluar është ish-i dashuri i saj, Elon Musk.

Kërkimet në Google për miliarderin janë rritur javët e fundit pas blerjes së Twitter, por emri i Heard ende kërkohet dy herë më shumë se ai i Musk, raporton ‘NewsWhip’.

Shumë njerëz po kërkojnë “Gjyqi Depp kundër Heard” në mediat sociale, me miliona njerëz që shikojnë fotot dhe videot e publikuara në TikTok. Videot me hashtag #JusticeForJohnnyDepp janë parë 8.3 miliardë herë në këtë media sociale.

Lajmet për inflacionin, luftën në Ukrainë dhe kufizimin e mundshëm të të drejtave të abortit vijnë pasi vendi vazhdon të vuajë nga pasojat e Covid-19.

Gjyqi për shpifje mes Depp dhe Heard rifilloi në Virxhinia të hënën pas një pauze njëjavore. Njerëzit në të gjithë vendin ishin gozhduar para ekraneve të tyre ndërsa Heard po merret në pyetje nga avokatët e Depp.

Depp po padit Heard për shpifje në lidhje me një shkrim të Washington Post të vitit 2018 që ylli i “Aquaman” shkroi, në të cilin ajo tha se ishte viktimë e dhunës seksuale dhe asaj fizike. Ajo nuk e përmendi emrin e Depp në artikull, por ai u shkrua pasi Heard paraqiti një urdhër ndalimi kundër ish-bashkëshortit të saj në vitin 2016 mbi akuzat për abuzim.

Depp kërkon 50 milionë dollarë dëmshpërblim. Heard ka ngritur një kundërpadi prej 100 milionë dollarësh.