Ata janë dy emra ikonë të ekranit, por së fundmi Pamela Anderson dhe Liam Neeson po përfliten më shumë për kiminë jashtë skene sesa për rolet e tyre.

Dyshja shkëlqeu në tapetin e kuq të premierës së komedisë “The Naked Gun”, duke shkëmbyer përqafime të përzemërta, buzëqeshje të sinqerta dhe një puthje që ndezi rrjetin.

Pamela mahniti me një fustan elegant ngjyrë vjollcë, bizhuteri diamanti dhe stil klasik, ndërsa Neeson zgjodhi një kostum gri të thjeshtë, por me klas. Çifti u shfaq si dy yje të shkëlqyer, por edhe si dy njerëz që ndajnë një afërsi më të thellë.

Kimi në film dhe jashtë tij

Në ribërjen e filmit legjendar të komedisë “The Naked Gun”, Neeson luan Frank Drebin Jr., djalin e personazhit të famshëm të Leslie Nielsen, ndërsa Pamela luan një këngëtare të ndjeshme, në kërkim të së vërtetës pas humbjes së vëllait të saj. Filmi pritet të publikohet më 1 gusht 2025.

Por ajo që po tërheq vëmendje është marrëdhënia e tyre jashtë kamerave. Liam e ka përshkruar Pamelën si “marrëzisht të dashur, pa ego, qesharake dhe e jashtëzakonshme në punë”. Nga ana e saj, Anderson tha se Neeson është një zotëri i vërtetë, që i jepte pallton kur ftohej në xhirime, ndërsa ajo e surprizonte me biskota dhe bukë të shtëpisë.

“Do të jemi miq përgjithmonë… ose më shumë?”

Pamela Anderson në një intervistë për Entertainment Weekly u shpreh se mes saj dhe Liam ekziston një lidhje e vërtetë:

“Është një valle mes komedisë dhe autenticitetit. Na u desh të zhyteshim në thelb të një bote që e ndërtuam bashkë. Ai është fëmijërisht qesharak dhe jashtëzakonisht i kujdesshëm.”

Dy zemra me histori të thella

Liam Neeson ka jetuar një dhimbje të madhe me humbjen e bashkëshortes së tij, Natasha Richardson, në vitin 2009. Ndërsa Pamela, e cila është martuar pesë herë, ka përjetuar luhatje emocionale dhe marrëdhënie të vështira – përfshirë atë me muzikantin Tommy Lee.

Tani duket se fati mund të ketë vendosur t’i ribashkojë dy shpirtra të përjetuar, në një moment të jetës ku ndoshta, janë më të hapur për një lidhje të vërtetë.