“Gati për të thyer një rekord të ri. Ju premtova që do ta bëjmë sërish Alpha Show-n dhe ja ku jemi sot, në të njëjtin shesh si vitin e kaluar, por këtë herë skenën e madhe do ta ndërtojmë përballë universitetit, me qëllim që edhe ata që do të jenë në fund të na shohin qartë”.

Kështu e ka nisur Noizy postimin e parë të lançimit të koncertit të tij të madh të radhës “Alpha Show 2” për të cilin biletat tashmë janë online.

 

View this post on Instagram

 

A post shared by NOIZY OTR (@noizy)

Nuk është zbuluar ende asnjë detaj nga koncerti i kësaj radhe, por ajo që të bën përshtypje janë emërtimet që u janë vendosur këtë herë plateve, të cilat do të ndajnë sheshin “Nënë Tereza” atë natë.

Nuk do të quhen si zakonisht pra Gold, Platinum, VIP etj por me emra shumë më specifikë: Illyrian Elite, Albanët, Ardianët, Dardanët Taulantët. Pas tyre do të renditen Illyrian Knights (Kalorësit), Illyrian Warriors (Luftëtarët) dhe Illyrian Shield (Mburoja). Janë të gjithë emra që vijnë prej historisë, si fise të njohura ilire, me një qëllim të qartë: për të risjellë në kujtesë vlerat historike, të shkuarën e lavdishme të shqiptarëve. Për ta lidhur atë me të tashmën dhe të ardhmen, lidhje kjo që do të trasmetohet në një koncept vizual të një Alpha City, të një arenë të madhe ku betejat për mbijetesë ekzistojnë në çdo kohë, që prej të parëve tanë. Dikur luftohej me shpata, sot me 100 mënyra të tjera për të ndërtuar të ardhmen tonë personale por dhe për të ardhmen e shoqërisë, vendeve ku jetojmë. Të gjithë duhet të ndihen ilirianë të vërtetë, krenarë për vendin e të parëve. S’ka rëndësi çfarë bilete do të zgjedhin ata që do vijnë tek Alpha Show 2. Le të zgjedhin të jenë Dardanë apo Taulantë, Ardianë apo Albanë, pak rëndësi ka, në fund të fundit të gjithë janë NJË– Ilirianë.

Këto janë mesazhet që do të përcjellë Noizy me Alpha Show 2, për të cilin thuhej pak kohë më parë se do të bëhej në stadiumin “Air Albania”, një plan ky i ndryshuar së fundmi për tri arsye, siç edhe ai vetë i komunikoi në Instagramin e tij: prej vapës që pritet të jetë në gusht(në shesh mund të ketë më shumë qarkullim ajri), prej ekove të forta që bën zëri në stadium dhe sepse ajo arenë nuk mund t’i nxërë njerëzit e shumtë që do të mblidhen në koncertin e tij.

U pa qartë se çfarë ndodhi një verë më pare në koncertin e tij. Këtë 4 gusht Noizy është i sigurt që do të thyejë një rekord të ri.