Ylli i filmave aksion, Steven Seagal, i cili u ndalua nga Ukraina për pesë vjet në 2017-n pasi Presidenti rus, Vladimir Putin i dha aktorit një pasaportë ruse, foli për konfliktin në Ukrainë të hënën, duke thënë se ai i shikon të dyja palët “si një familje”.

“Shumica prej nesh kanë miq dhe familje në Rusi dhe Ukrainë. Unë i shikoj të dyja si një familje dhe me të vërtetë besoj se është një ent i jashtëm që shpenzon shuma të mëdha parash për propagandë për të provokuar që të dy vendet të jenë në mosmarrëveshje me njëri-tjetrin. Lutjet e mia janë që të dy vendet të arrijnë në një zgjidhje pozitive, paqësore, ku ne mund të jetojmë dhe të lulëzojmë së bashku në paqe”, tha ylli i aksionit për mediat amerikane.

Ylli i “Under Siege” u emërua si i dërguar i posaçëm për lidhjet humanitare me Shtetet e Bashkuara nga Ministria e Jashtme ruse në vitin 2018.

Në vitin 2021, Seagal u përfshi zyrtarisht në partinë politike Pro-Putin “Një Rusi e Drejtë”.

Atij iu dha shtetësia ruse në vitin 2016 dhe mbrojti udhëheqjen ruse për aneksimin e Krimesë në vitin 2014, duke e quajtur Putinin “një nga liderët më të mëdhenj të botës”.

Muaj pasi iu dha shtetësia ruse dhe iu dha personalisht një pasaportë nga Putin, Ukraina e konsideroi aktorin një kërcënim për sigurinë kombëtare dhe e ndaloi atë nga vendi për pesë vjet.

Shtetësia e Seagal supozohej të ishte një shenjë e përmirësimit të marrëdhënieve midis SHBA-së dhe Rusisë. Të dy, si Seagal ashtu edhe Putin praktikojnë arte marciale dhe kanë marrë pjesë në disa ngjarje së bashku gjatë vizitave të tij në Rusi.