Një ngjarje që të lë pa frymë ka ndodhur sot në Himarë, ku një skaf ka goditur një fëmijë rreth 5 vjeç i cili ka humbur jetën. Mësohet se autori, është me gradën Komisar dhe me detyrë Shef i Seksionit të Policimit në Komunitet në Komisariatin e Policisë Elbasan.

Burime nga policia bëjnë me dije se ngjarja ka ndodhur rreth orës 14:00, në plazhin e Potamit, ku shtetasi A. T., duke drejtuar një mjet lundrues tip skaf, dyshohet se ka humbur kontrollin dhe për pasojë mjeti lundrues ka goditur një fëmijë rreth 5 vjeç, i cili për shkak të dëmtimeve ka ndërruar jetë në vendngjarje.

Drejtuesi i mjetit lundrues është shoqëruar në Komisariatin e policisë Himarë dhe po kryhen procedurat për ndalumin e tij.

Grupi hetimor ndodhet në vendngjarje dhe po punon për sqarimin e plotë të rrethanave të ngjarjes. Pushime që të marrin jetën!

Ky është rasti i tretë brenda një muaji që skafet në plazhet e Shqipërisë aksìdentojnë pushuesit. Rasti i dy të rinjve është fare i freskët por për fat ata ia hodhën të dy.

Deri kur do zgjasë kjo papërgjegjshmëri e këtyre individëve që lundrojnë e bëjnë xhiro në breg të detit ku lahen pushuesit? Edhe sa të tjerëve duhet tu ndodhë diçka e tillë?