Pas njoftimit të Paolo Dybala, vjen lajmi për dy pozitivë të tjerë me koronavirus në Serie A e bëhet fjalë për Paolo Maldini e djalin e tij Daniel. Lajmin e ka dhënë klubi i Milan me një komunikatë zyrtare: “AC Milan bën të ditur se Drejtori i zonës Teknike i Klubit, Paolo Maldini, duke u njohur me faktin se ka patur kontakt me një person pozitiv e shfaqte simptomat e virusit, i është nënshtruar dje tamponit që ka rezultuar pozitiv me koronavirus.

Në të njëjtën mënyrë, kjo gjë i ka ndodhur edhe të birit Daniel, sulmuesi i të rinjve kuqezinj i thirrur në ekipin e parë. Paolo e Daniel janë në gjendje të mirë e, pasi kanë kaluar më shumë se dy javë në banesën e tyre pa kontakte të jashtme, si parashikohet në protokollet mjeko-sanitare, do të zgjasin karantinën për kohën e nevojshme të shërimit të plotë klinik”.