Për Mariza Ikonomin fjala ka shumë fuqi inspiruese dhe e përqafuar bashkë me tingullin ajo kthehet në sublimitet për të. Si një këngëtare që është rritur në skenë dhe televizion, ka vendosur t’i gërshetojë të dyja në këtë moment të karrierës, pasi përveç netëve ku këndon “live”, ajo mbrëmjet e të dielave tani i kalon me kolegët artistë në emisionin e saj të titulluar “Me Marizën” në “Tv Scan”. Në këtë intervistë për revistën “Story” direkt pas pushimeve të verës, Mariza rrëfen gjithçka për dashurinë, paratë, vitet dhe pse ka vendosur të mos ndryshojë asgjë në pamjen e saj…

Të shohim në pozicionin e intervistueses përballë kolegëve të tu artistë. Gazetaria apo televizioni kanë qenë një pasion yt i hershëm?
Në fakt pasioni im ka qenë dhe mbetet muzika, por unë në ambientet e televizionit shqiptar kam hyrë në një moshë fare të vogël, dhe pikërisht në këtë institucion kam pasur eksperiencat e mia të para, jo vetëm si muzikante por edhe si prezantuese. Kështu pa dashur e pa kuptuar më kanë hyrë që të dyja profesionet në zemër.
Në rrëfimet e rrugëtimit artistik të secilit të ftuar i pyet për dashurinë, paratë, ëndrrat, pengjet, etj. Ndodh të vihesh në siklet kur u bën pyetje delikate?
Në fakt nuk më pëlqen t’i vë personazhet në siklet. E mendoj si për veten time… Mua nuk do të më pëlqente një gjë e tillë, kështu që dua të marr më të mirën e tyre, dhe të zbuloj detaje të cilat ata nuk i kanë thënë më parë pa i vënë në siklet.
Cili i ftuar të ka impresionuar me rrëfimin e tij, kush të ka prekur vërtet dhe kush të ka motivuar?
Të gjithë personazhet kanë qenë impresionues, por ajo që më ka ngelur në mendje është intervista me Françesk Radin. Ajo intervistë ka ngelur një intervistë zemre ashtu siç kam kënduar edhe këngën me të “Telefonatë zemrash”.
Sa të ftuar ke pasur deri tani dhe mund të na zbulosh ndonjë emër surprizë që të ka thënë po?
Kam pasur rreth 16 të ftuar, por surprizat nuk i zbuloj ende.
Një artiste si ty çfarë ndjen kur prioritet të punës vendos fjalën, siç ndodh në studion e emisionit “Me Marizën”?
Për mua fjala është gjithçka. Vetëm me një fjalë mund të dalësh në dritë, ose edhe mund të mbetesh në errësirë nëse nuk di ta përdorësh siç duhet. Fjala ka shumë fuqi inspiruese dhe e përqafuar bashkë me tingullin, ajo kthehet në sublimitet për mua.
Është më e vështirë për ty të këndosh apo të bësh pyetje?
Sigurisht që pyetjet në këtë rast, sepse që të marrësh përgjigje të mira e të bukura duhen edhe pyetjet të menduara mirë dhe interesante…
Të dielat e emisionit i mbyll me improvizime live me të ftuarin e puntatës. I di përmendësh këngët e kolegëve, apo zakonisht je indiferente për t’i fiksuar?
Jo, nuk jam indiferente, sepse ka këngë që duhen studiuar, por ka edhe nga ato që dalin në një mënyrë spontane pa i pritur fare. Preferoj që të përgatitem më parë, edhe pse e di që sa herë që i këndojmë me të ftuarin do na dalin gjithmonë tinguj improvizues.
Shumë këngëtarë komentohen për fitimet e mëdha nga muzika. Ti je një prej tyre?
Mund të them që ndihem shumë e pasur shpirtërisht që s’ka pagesë që e zëvendëson. Ju e dini që të bësh para në Shqipëri, duhet ose të këndosh muzikë popullore ose tallava, ose të bësh dasma. Unë nuk jam e atij target grupi edhe pse di ta këndoj shumë mirë edhe muzikën popullore. Por përsëri mund të them që fitoj mjaftueshëm, sepse kam një publik që e kam gjithmonë me vete dhe që më vlerëson.
Këtë vit ke festuar 34 vjetorin. Kjo moshë të trishton apo vitet s’ndikojnë aspak tek ty?
Më pëlqen më tepër, sepse e kuptoj që jeta s’më ka lënë fëmijë dhe kam mësuar shumë prej saj…
Më të lumtuar na bën dhe dashuria… Ti je e dashuruar dhe kur mund ta prezantosh partnerin tënd?
Për momentin po përjetoj një emocion të bukur dhe kaq mjafton.