Artisti i Teatrit të Operës dhe Baletit, Xhieldo Hyseni, është shpallur fitues në konkursin prestigjioz për këngëtarët e rinj lirik “AsLiCo”, të zhvilluar nga “Teatri Social i Como-s”, në Itali.

27-vjeçari arriti të rrëmbente në finalen që u mbajt të dielën e 8 janarit, mes shumë konkurrentëve, rolin e Salastros për veprën operistike të Mozart-it “Flauti magjik”, për ta interpretuar atë në teatrot e Lombardisë.

Lajmin e bëri të ditur vetë drejtoresha e Përgjithshme e TKOB-së, Abigeila Voshtina, e cila e uroi për arritjen dhe u shpreh krenare.

“Promovimi i të tilla talenteve përtej kufijve iu hap rrugën këngëtarëve të rinj, me aftësitë e duhura, të zgjerojnë horizontin dhe të rriten si nga ana artistike, asht edhe ajo profesionale“, tha ajo.

Përgjatë maratonës 3-ditore, në edicionin e 74-t të këtij konkursit, Shqipëria u përfaqësua nga tre të rinjtë e TKOB-së, Rovena Xhelili, Xhieldo Hyseni dhe Bledar Domi, në bashkëpunim me Rame Lahaj International Opera Festival (RLIOF) dhe me kujdesin e veçantë të drejtorit Artistik të RLIOF-it, Ulpiana Aliaj.

Kujtojmë se Xhieldo Hyseni është i njohur për publikun shqiptar edhe me grupin e tij Alar Banda ku kanë marrë pjesë në disa festivale dhe kanë bërë disa hite.