Ka kaluar një vit që nga fillimi i gjyqit mes Johnny Depp dhe Amber Heard. Kur gjithçka filloi, askush nuk e kishte idenë e ndikimit masiv që kishte në mbarë botën. Siç ndodh me çdo debat, të dy yjet e Hollivudit kishin fansat e tyre që luftonin në internet me gjithçka që kishin.

Por tashmë rëndësi ka sesi të dy e kanë kapërcyer këtë fazë të jetës së tyre. Kalimi i një divorci është mjaft sfidues, por bërja e tij në një mënyrë kaq publike duhet të jetë vërtet shumë e vështirë për këdo. Mediat iu drejtuan të dy aktorëve për t’i pyetur se si ata janë një vit pasi u zhvillua ky gjyq. Të dy janë përgjigjur përmes burimeve pranë tyre.

Amber Heard jeton në Malaga të Spanjës. Ajo dëshironte të largohej nga qendra e vëmendjes, dhe donte të rriste vajzën e saj, vogëlushen Oonagh, në qetësi. “Amber mezi priste të largohej nga SHBA me vajzën e saj. Ajo ka jetuar në Spanjë, ku ka më shumë privatësi. Gjyqi ishte përtej stresit për të dhe ajo thjesht donte të largohej nga gjithçka. Ajo ishte e rraskapitur dhe e zhgënjyer nga gjyqi, nga i cili u ndje e keqtrajtuar. Megjithatë, tashmë ajo ka energji të re dhe është e fokusuar në gjërat që i do, është e emocionuar për punën dhe xhirimet që po kryen”, tha një burim pranë “People”.

Ndërkohë Depp ka punuar shumë, duke qëndruar larg dhimbjes që i la kjo sprovë. Nga turneu muzikor me të ndjerin Jeff Beck deri te prodhimet e shumta filmike. Depp është kthyer në punë me shumë projekte. Ai po jeton në fshatin anglez në një rezidencë që bleu në Somerset. “Sapo mbaroi turneu i tij, ai u hodh në xhirimet e Jeanne Du Barry. Xhirimet ishin sfiduese, por Johnny është i emocionuar për rikthimin. Ai po jeton në Evropë që nga gjyqi. Ai po del në takime me gra, por nuk ka të dashur”, tha një burim pranë “People”.