Ulqini do të mirëpresë në fillim të muajit shtator sopranon shqiptare me famë ndërkombëtare, Inva Mula, në Festivalin Ndërkombëtar “Belcanto Dolcinio”. Për të tretin vit radhazi, Festivali Ndërkombëtar i Muzikës Klasike do të mbahet në Ulqin, në datat 7, 8 dhe 9 shtator, ndërsa pikërisht mbrëmja e fundit i është rezervuar sopranos shqiptare. E njohur për miqësinë prej vitesh me artistin Genc Tukiçi, sopranoja do të performojë së bashku me pianistin virtuoz në pjesën e vjetër të qytetit turistik të Ulqinit, shkruan Top Channel. Festivali i organizuar nga fondacioni kulturor shqiptaro-amerikan dhe Komuna e Ulqinit nisi në vitin 2016 me synimin për të çuar tingujt e muzikës klasike në qytetin bregdetar shqiptar në Malin e Zi, duke shënuar këtë vit edhe edicionin e tij të tretë.