Nga Klotilda  Harka

Krist Aliaj, është një nga lojtarët më të komentuar të “Big Brother VIP 2” për bisedat e tij argumentuese dhe filozofike, por edhe për dinamikat që ka krijuar me vajzat në lojë. Një vit më parë ai mori pjesë në një tjetër “reality show” si “Love Story”, dhe direkt pas largimit spektakolar bëri një rrëfim ekskluziv për kopertinën e revistës “Story”, të cilën po e ri sjellim në vëmendjen tuaj. Një vit më parë Krist Aliaj ishte “Princi modern” që babai i tij Robert Aliaj komentoi brenda formatit  në “Love Story”, në garën për të zgjedhur partneren e jetës, ndërsa këtë vit Roberti po e komenton nga jashtë.  Me studime për Shkenca Politike, i talentuar në pikturë dhe muzikë si i ati, gjithashtu një nga pasionet e tij janë parfumet, që  i konsideron një botë më vete për t’u zbuluar, dhe mënyrë unike për të nuhatur femrën e duhur. E për arketipin e mashkullit që përfaqëson dhe që ua lë grave në dorë që ta zbulojnë, ja si u përgjigjej një vit më parë Kristi pyetjeve për jetën, dominimin në një reality, dhe dashurinë që lind në televizion. Bashkëngjitur me intervistën po ju sjellim dhe fotot sensuale të Kristit me modelen Sonja Ramadanaj, realizuar ekskluzivisht për kopertinën e revistës “Story”, nga Sonny K Elson:

Krist, largimi yt nga “Love Story” në mes të spektaklit bëri përshtypje. Ishte largim i vërtetë që duhet ta besojmë apo me skenar?

Për mua ka të vërtetë , jo-të-vërtetë dhe përfundimisht anti-vërtet. Kjo e fundit kaloi masat dhe ma hoqi dëshirën të vazhdoja cirkun aty.

Duke u kthyer tek eksperienca në “Love Story” a ke ndjerë në ndonjë moment mrekullinë e peshës se fjalës “love”(Dashuri)?

Gjëja më e rëndësishme në “Love Story” nuk është dashuria, por e vërteta. Dashuria nuk mund të lindë dhe të mbijetojë pa të. Përderisa nuk ka të vërtetë, nuk ka asnjë shans për dashuri.

A je tipi që mund të martohesh me vajzën që mund ta kesh njohur në televizion pavarësisht largimit, apo këtë show, mund ta konsiderojmë thjesht një provë teknike për zgjedhjen e vërtetë?

Unë jam tipi që mund të dashurohem kudo rastësisht. Por televizioni dhe kushtet e tij na e vështirësojnë shumë dashurinë. Kjo mund të shihet më shumë si një “eksperiment dashurie”, dhe jo si një “histori dashurie”.

Përballë babait Robert Aliaj që shpesh kritikonte puthjet pa ndjenja, ndërrimin e partnereve, apo edhe banalitetin e joshjes, në jetë gjen veten tek ai, apo përballesh me kundërshtarin e ideve? 

Një person i shëndoshë është një person që kupton se kurrë nuk e di plotësisht atë që po bën ose thotë, ky është çelësi i evolucionit. Në këtë kuptim, unë i marr me respekt fjalët e Robertit, por gjithashtu e kuptoj që dashuria është komplekse dhe e jetuar shumë personalisht. Por mendimi i një personi të tretë për dinamikën e marrëdhënieve është gjithmonë i mirëpritur.

Në një intervistë Roberti është shprehur se: “Gjithmonë kam dashur që djali im ta vrasë simbolikisht figurën e babait të vetë”. Je dakord me këtë, si mund të bëhej realitet si koncept mes jush, dhe mund të themi se me pjesëmarrjen në një show si ky ti e vrave babanë apo do e vrasësh së shpejti?

Për të vrarë Robertin do të duhej më shumë sesa thjesht pjesëmarrja ime në këtë show (qesh). Është një rrugë e gjatë përpara. Por në mënyrë metaforike është gjëja moralisht e saktë të bësh, të vrasësh një prind simbolikisht dhe të evoluosh në diçka më të vlefshme dhe më të virtytshme.

Ka ndodhur që për shkak të një debati ku është thënë një fjalë më shumë, keni pasur telashe me vajzat ti, Roberti, apo të tjerë dhe si e keni zgjidhur?

Konfliktet dhe debatet janë ato që nxisin shfaqjet televizive dhe shfaqjet e takimeve në përgjithësi. Ato janë të nevojshme dhe pasqyrojnë situata të jetës reale. Kur futemi në një format “reality”, duhet të marrim parasysh dhe të jemi shumë në përputhje me pasojat e pjesëmarrjes aty. Së fundmi, duhet të jemi të vëmendshëm dhe të vetëdijshëm që jo të gjitha problemet duhet të zgjidhen aty.

Mami dhe Gala kanë ndërhyrë javë pas jave me këshillat e tyre, dhe cilat vajza ishin të preferuarat e tyre për t’i parë njërën apo tjetrën në krahun tënd?

Të dyja janë shumë skeptike ndaj tyre (gratë në emision), sepse qëllimet dhe sjellja e tyre nuk janë vërtet të qarta. Ato më japin këshilla për sjelljen time ndaj tyre dhe më shumë. Por sinqerisht, ato nuk janë të interesuara për asnjërën!

Bleona të emërtoi një Christian Grey të dytë.  A ndjehesh dhe ti i tillë, dhe është ky modeli i djalit që tërheq kedo?

Fakti që “Fifty Shades of Grey” është termi më i kërkuar në Google nga përdoruesit femra, thotë shumë për seksualitetin modern femëror. Christian është padyshim një arketip i burrave, që shumica e grave e shohin të pa rezistueshëm për shkak të anës së tij të errët të zhvilluar mirë. Bleona nuk kishte plotësisht të drejtë me krahasimin, por e kuptoj pse shumë njerëz do të pajtoheshin me të. Personalisht, unë përshtatem me një arketip tjetër burrash, të cilin nuk do ta shtjelloj më tej. Gratë duhet ta zbulojnë!

Kishe një rival impulsiv si Xhoni, çfarë mendon për të në mënyrën si afrohet me vajzat?

Kolegu im do ta ketë më të lehtë të zgjedhë, sepse ai ka një vizion më të thjeshtë për dashurinë dhe gratë në përgjithësi. Kështu që unë parashikoj se ai do të jetë më i suksesshëm në ambicien e tij për dashuri.

Një Princ modern si ty çfarë varësish ka, çfarë mëkatesh bën, çfarë fantazish ka në jetën seksuale?

Për sa u përket fantazive seksuale, nuk më interesojnë apo u kushtoj shumë rëndësi. Ato nuk ushqejnë energjinë dhe dëshirat e mia seksuale. Seksualiteti im nuk drejtohet realisht prej tyre. Të kesh një fantazi seksuale na lejon të ndiejmë eksitimin që lidhet me skenarë të caktuar pa i jetuar ato. Si rezultat, unë preferoj realitetin sesa imazhet dhe skenarët që lundrojnë në kokën time.

A beson vërtet tek dashuria?

Dashuria është e rëndësishme dhe bëhet një aftësi shumë e vështirë për t’u mësuar dhe mbajtur. Varet nga mënyra se si përdoret, në mënyrë destruktive apo konstruktive. Mund të shkatërrojë ose të krijojë jetë, prandaj përdoreni me mençuri!

Po tek martesa sa beson?

Lidhur me martesën sinqerisht mendoj se e bën jetën dhe romancën më të lehtë në shumë aspekte. Njerëzit kanë prirjen të abuzojnë me dashurinë dhe emocionet e forta. Martesa është një mënyrë e mirë për t’i “kontrolluar” këto nxitje njerëzore në një mënyrë pozitive.

Si një specialist parfumesh, si do e përshkruaje dhomën në natën e parë të martesës?

Aroma natyrale e zgjimit femëror është aroma më e mirë që mund t’i përshtatet asaj situate. Pa parfum do të thosha. Dritaret duhet të qëndrojnë të mbyllura atë natë (qesh). Por në përgjithësi preferoj femrat që mbajnë parfume me profil aromatik  “jeshile – natyrale – drunore – frutash”. Fiku është nota olfaktive e imja e preferuar për një grua.

Dashuria e vërtetë është lumturi apo dhimbje, dhe sa mund të zgjasë për ty?

Dashuria duhet të jetë edhe dhimbje edhe kënaqësi, një akt i ekuilibruar në mënyrë të përkryer. Mund të zgjasë për aq kohë sa ekziston dëshira për ta mbajtur gjallë.

/www.story.al