Pjetër dhe Marta Nikolla janë një çift bashkëshortësh që kanë një histori shumë të bukur dashurie. Ata janë fejuar që në djep dhe sot janë bashkë prej 64 vitesh. Tashmë, janë prindër të pesë fëmijëve dhe janë bërë gjyshër, por historinë e tyre e kujtojnë me shumë dashuri.

Të ftuar në “ABC e Mëngjesit”, çifti kanë rrëfyer mes emocionesh gjithë detajet e tyre.

“Familjet tona njiheshin se halla e Pjetrit ishte në fshatin tonë e martuar. Nënën time e kishte shoqe të ngushtë siç ishin gratë atëherë, shkonin jashtëzakonisht mirë. Kur linda unë, i tha nënës sime: ‘Shyqyr që nuk lindi çun, po lindi goc se unë do ta marr për djalin e vëllait’. Ngeli ajo fjala pastaj. U bëra një vjeç dhe erdhën siç janë zakonet, sollën një unazë dhe një shami katrore. Atë unazën e mbajti nana, kurse atë shaminë e grisa unë, nuk e ruajta se nuk e kuptova. Kemi 7 vite diferencë.

Ka qenë burrë i bukur, simpatik, i zgjuar, tip i hedhur shumë. Më ra fat i mirë mua, por edhe këtij nuk i ka rënë keq. Jemi mirëkuptuar gjithë jetën, nuk kemi mbajtur inate njëri-tjetrit.”, u shpreh Marta.

“Ne shkonim te halla dhe halla e kishte shtëpinë afër asaj familje ku ne ishim lidhur. Ne kishim miqësi të vjetër me atë familje. Baza e familjes kur kërkoje një lidhje për fejesë dhe për martesë ishte ajo. Pra, kur kërkoje një vajzë ta merrje për djalin duhet të zgjidhje familjen. Edhe familja ishte e zgjedhur sepse për arsye se njiheshin. E ëma e Martës ishte nga një familje e mirë, vjehrra ime ishte motra e mësuesit të popullit, që ka hapur shkollën. Kështu që ishte një familje e njohur.

Ishte disi e veçantë kjo lidhje. Këtu nuk kishte të bënte fare shkesia, por kishte të bënte me miqësinë e vjetër. Ne meqënëse shkoja unë te halla dhe prindërit ma kishin këtë histori, më prisnin mirë dhe ne e shikonim njëri-tjetrit. Kjo i ulte sytë se ishte më e ndrojtur, ndërsa unë e shihja. Ishte punë opinioni. Ishte shumë e bukur. Unë kam provuar një dashuri të ndrydhur. Ne vetëm e shikonim njëri-tjetrin, nuk dilnim për shkak të opinionit”, tregoi Pjetri./Abcnews.al