Dragos Savulescu, bashkëshorti i Angela Martinit, ra në prangat e policisë në muajin gusht pas një kohe të gjatë në arratisje. Ai u arrestua në Mykonos bashkë me një tjetër person në ishullin e famshëm, ku shpenzoi shifra marramendëse në restorante dhe jahte. Për kapjen e tij u përfshinë zyrtarët e Nën Drejtorisë së Policisë së Mykonos. Mirëpo Dragos u lirua vetëm një ditë pas arrestimit.

Biznesmeni rumun u la i lirë nga autoritetet greke pasi u verifikua që çështja e tij ishte mbyllur në Itali. Gjykata italiane e mori vendimin për Dragos Savulescu-n, pavarësisht çdo pretendimi nga autoritetet rumune.

Ditë më parë çifti i famshëm kanë zbuluar se Dragos ka fituar përfundimisht pafajsinë në Greqi dhe se gjykata greke ka bllokuar përpjekjen e Rumanisë për ekstradimin e Dragos. Vendimi shënon herën e dytë që një gjykatë europiane ka refuzuar një kërkesë ekstradimi për të.

Gjykata e Apelit e Egje-së në Syros doli në krah të Savulescu, duke rënë dakord se Rumania nuk kishte fuqi të detyronte ekstradimin e tij nga Greqia dhe urdhëroi pushimin e menjëhershëm të urdhër arrestit rumun.

Së fundmi Dragos dhe Angela Martini ka dhënë një intervistë për median greke Protothema.

Biznesmeni rumun e ka konsideruar të paligjshëm kërkesën e Rumanisë duke theksuar se ka ndërmend që të ngrejë padi ndaj autoriteteve rumune.

“Përveç faktit që kam humbur para dhe kohë, kam vuajtur shumë nga sulmet që vijnë nga media, të cilat bazoheshin në lajme të rreme. Ajo pësoi dëmtime psikologjike, gruaja ime as nuk mund të flinte dhe të hante.

Shëndeti ynë, imazhi ynë, jeta jonë e biznesit u prek. Ne duhet t’i kërkojmë qeverisë rumune të paguajë për këtë dëm serioz dhe mendoj se kemi shumë arsye legjitime për ta pretenduar këtë. Përveç kësaj, është çështje parimore të mos lejojmë që një regjim të shkatërrojë imazhin dhe jetën tonë. Ne duhet të inkurajojmë të tjerët të bëjnë të njëjtën gjë, pasi ne nuk jemi viktimat e vetme të regjimit, ka shumë të tjerë që po përjetojnë të njëjtën gjë,” u shpreh ai.

Ndër të tjera ai shpjegoi si do të nisë hetimin.

“Unë mund të plotësoj një dosje në Konventën për të Drejtat e Njeriut dhe të shkruaj për akuzat e drejtësisë rumune kundër meje. Gjithçka është aq e qartë, sa kam mbledhur prova të tjera ndër vite. Nuk kam dyshim se drejtësia e vërtetë do të mbizotërojë, ne jemi në Evropë, jo në Rumani. Rumania duhet të bëhet evropiane. Vendi ende jeton në kohën e Çausheskut. ”

Nga ana tjetër, Angela Martini ka përshkruar në detaje natën e arrestimit të bashkëshortit të saj në Mykonos.

“Unë bërtisja sepse ishin veshur si qytetarë normalë dhe nuk mendoja se ishin punonjës policie. Isha në panik. Nuk dija si të ndihmoja. Ne u treguam letrat tona italiane në stacionin e policisë, por për shkak se ato ishin të shkruara në italisht dhe anglisht, ata na thanë të kalonim natën në polici. Ne do të qëndronim në Mykonos nga 3 deri më 18 gusht, por nuk mund të ktheheshim në shtëpi deri javën e kaluar, kur kërkesa për ekstradim u refuzua “.

Martini foli po ashtu për arsyen që Rumania kërkon të ekstradojë bashkëshortin e saj.

“Ne po flasim për një çështje civile që u shndërrua në mënyrë abuzive në një krim nga prokurorët rumunë për arsye të forta politike, për shkak të një kryetari të mirënjohur i cili është i përfshirë në këtë çështje. I ashtuquajturi krim ndodhi 19 vjet më parë. Në vitin 2002, kur isha 28 vjeç. Akuza ishte për bashkëpunim në shpërdorimin e pushtetit, jo për pastrim parash ose krime të tjera. Ishte një rast risigurimi për parcelat e tokës që ishin vjedhur nga regjimi komunist rumun në të kaluarën.

Kam fituar ligjërisht disa prona të paluajtshme, por ata e konsideruan atë të paligjshme dhe dënuan 36 persona për shkak të saj. Kjo çështje duhet të trajtohet në një çështje civile, jo në një çështje penale. Fatkeqësisht, pavarësisht nga arsyet politike prapa çështjes, ka aspekte negative të sistemit ligjor të Rumanisë.”, tha ai.

Po Dragos a e mendon si një mundësi kthimin e tij në Rumani?

“Nëse Rumania zbaton drejtësinë e vërtetë dhe mbështetet në ligjin europian, unë do të jem në gjendje të kthehem pa asnjë problem. Në fakt, kam frikë se autoritetet rumune do të më vënë në shënjestër. Duke pasur parasysh rrethanat, nëse kthehem ata mund të shpikin një rast tjetër dhe të vazhdojnë në një arrestim tjetër të paligjshëm. Fatkeqësisht, kjo ka ndodhur me shumë njerëz të tjerë. Dhe pastaj, nuk ka rrugëdalje. Në këto rrethana, nuk do ta konsideroj kthimin në Rumani. Ne do të shohim se çfarë do të ndodhë,” tha ai.