Gazetarja investigative britanike e njohur për realizimin e dokumentarëve me disa nga kriminelët më famëkeq në botë, Livvy Haydock ka habitur me deklaratën e saj, pasi gjeti mbështetje te kriminelët që intervistoi, kur u diagnostikua me sklerozë të shumëfishtë (MS).

“Gjithmonë më kanë thënë se nuk kam frikë nga asgjë, por kjo MS më tmerron. Ndihem kaq e vogël”, pranon ajo.

BBC raporton se 38-vjeçarja ka jetuar një jetë plot tension, duke prodhuar dhe prezantuar dokumentarë me tema nga bandat e vajzave deri tek fëmijët ushtarë në Kongo.

Dokumentari i saj i fundit është “Gangster: Historia e John Palmer” për BBC Sounds, e cila heton përfshirjen e tij në grabitjen e shufrave të arit në Brink’s-Mat të vitit 1983, grabitja më e madhe e armatosur në historinë britanike.

Ishte dashuria e saj për muzikën rap amerikane si adoleshente që formoi magjepsjen e saj me botën kriminale, bandat dhe dhunën.

“Doja ta kuptoja. Shumë herë njerëzit që kryejnë krime nuk mund të flasin për këtë nga këndvështrimi i tyre”, thotë ajo.

Kjo e ka ndihmuar atë të kuptojë se çfarë i motivon ata të ndërmarrin rreziqe të tilla dhe se si ndonjëherë zgjedhjet mund t’u duken “logjike”.

Pikërisht ndërsa Livvy po hetonte luftën kundër drogës në Filipine në vitin 2016, nis kthesa në jetën e saj.

“Kishte vërtet diçka që nuk shkonte me këmbët e mia”, thotë ajo, e cila pasi mbaroi xhirimet e saj dhe u kthye në Mbretërinë e Bashkuar, simptomat vazhduan. Gjatë katër viteve të mëpasme ajo bëri disa vizita te mjeku, por kurrë nuk u diagnostikua.

Në vitin 2020 u sugjerua që ajo t’i nënshtrohej një testi të lëngut të saj kurrizor për të “përjashtuar MS”. Por rezultati konfirmoi krejt të kundërtën.

Pas një telefonate nga një neurolog që konfirmoi se Livvy kishte MS, asaj iu tha se do të merrte një telefonatë tjetër, brenda javës, për të planifikuar trajtimin e saj. Por kaluan javë dhe asnjë telefonatë nuk erdhi.

“Ishte sikur të më kishin dhënë një granatë”, thotë ajo, ndërsa u shpërqëndrua nga sëmundja duke u fokusuar në dokumentarin që po punonte për bandat e rrëmbyesve.

Infermierja më në fund e telefonoi dhe kur Livvy filloi të përpunonte diagnozën, ajo e dinte se do të duhej ta konsideronte të ardhmen e saj me shumë kujdes, veçanërisht kur bëhej fjalë për hetimet e saj të rrezikshme.

Por puna e saj ka qenë gjithashtu shpëtimi i saj, jo vetëm si diçka në të cilën ajo mund të humbiste mendjen, por edhe si një burim mbështetjeje dhe ndjeshmërie.

“Unë has shumë paaftësi brenda botës së krimit. Në një moment, shumica e anëtarëve të bandës që intervistova ishin ose në karrige me rrota, ose kishin probleme të vazhdueshme mjekësore nga plagët me armë zjarri”.

Disa nga kriminelët me të cilët flet Livvy janë gjithashtu kujdestarë për miqtë dhe familjen e tyre me aftësi të kufizuara.

MS ndodh kur shtresa mbrojtëse që rrethon fibrat nervore – mielina – dëmtohet dhe ndalon mesazhet që rrjedhin midis trurit dhe trupit. Mund të ndikojë në palcën kurrizore dhe të ndikojë në shikim, lëvizje dhe ekuilibër.