Vdekja tragjike e ishmenaxherit të “Babastars” me lider Getoar Selimin tronditi këtë javë Prishtinën, për faktin se vrasës u deklarua babai i tij, Skënder Krasniqi.

Historia u paraqit e koklavitur për faktin se mediat e Kosovës shkruanin se pas kësaj vrasjeje fshihej konflikti mes nuses, djalit dhe vjehrrit. Sipas disa shkrimeve në media, shkak për konfliktin babë e bir, u bë ndarja e para disa ditëve të Albertit të ndjerë me bashkëshorten, ish-Miss Kosova 2006.

Sipas tyre, ai kishte dhunuar Besën, duke e bërë për spital dhe i ati i kishte kërkuar të vetëdorëzohej në polici për dhunën ndaj ishbashkëshortes, e cila fill pas ndarjes u zhduk nga rrjetet sociale.

Gjakrat në familje ishin nxehur, pasi Besa, e cila për një kohë të gjatë ka qenë e martuar me Albertin, ishte ndarë dhe larguar nga shtëpia e tij pas disa vitesh martesë.

Një javë më parë, Prive zbuloi se ish-Miss Kosova për këtë arsye kishte mbyllur dhe rrjetet sociale. Ndërsa Alberti kishte fshirë të gjitha fotot familjare nga “Instagram”-i, duke lënë vetëm ato me vajzën, fotot e së cilës i kishte postuar vetëm disa orë pasi të mbetej i vrarë. Çifti kishte pasur edhe një krizë martesorë në vitin 2017, për të cilën Besa foli publikisht, krizë që e kapërcyen dhe u rikthyen sërish bashkë si familje.

Krizat në çift, Besa jo vetëm që i pranoi, por ajo foli edhe për konfliktin e bashkëshortit me Noizyn e Cozman, ku Alberti ishte personi që plagosi Noizyn.

Kujtojmë që pasi Alberti doli nga burgu, babai i tij dhe i Noizyt organizuan një takim në kufi ku i falën gjakun njëri-tjetrit. Dhe pak gati pesë vitesh, Prishtina tronditet përsëri, po këtë herë arma është në dorën e babait të tij, i cili i ka marrë jetën të birit.

Sipas raportimneve të para policore, dyshohet se viktima ka pasur probleme familjare dhe kishte kërcënuar prej disa ditësh familjarët e tij për t’i plotësuar kushtet që kërkonte, kanë raportuar tutje mediat.

Më pas, mediat treguan se Albert Krasniqi ka qenë në kërkim nga Policia në lidhje me një rast të dhunës fizike ndaj Besa Gashit, ish-bashkëshortes së tij, dikur Miss. Ka qenë pikërisht kjo ngjarje, që ka përçarë familjen e biznesmenëve dhe veçanërisht marrëdhënien speciale si babë e bir, që shiheshin kudo bashkë si dy shokë të vërtetë.

Sipas mediave të Kosovës, vrasja e Albertit erdhi pas një përplasje që ai ka pasur paraprakisht me babanë e tij, i cili i kishte kërkuar që të vetëdorëzohej në Polici për dhunën që kishte ushtruar ndaj ish-gruas së tij, Besa Gashin.

Albert Krasniqi ishte i martuar me ish-missin e Kosovës prej shumë vitesh, ndërsa së fundmi ata i dhanë fund martesës së tyre, pasi kishin pasur kriza edhe në të kaluarën. E direkt pas vrasjes, mediat nisën raportimin me titullin: “Vrau djalin biznesmen, zbulohet sherri mes babait, djalit dhe nuses. Ja motivet që çuan në krimin e rëndë”.

Skënder Krasniqi dyshohet se vrau djalin e tij, biznesmenin Albert Krasniqi, rreth orës 17:00 në rrugën “Ndue Perlleshi”, në Prishtinë. Direkt pas ngjarjes, babai i viktimës është arrestuar nga Policia e Kosovës dhe është konfiskuar arma, me të cilën dyshohet se është kryer vrasja. “Ejani se e vrava djalin!”, kështu e ka denoncuar rastin babai i Albert Krasniqit, duke e njoftuar vetë Policinë.

Gjykata Themelore në Prishtinë ka aprovuar kërkesën e Prokurorisë Themelore në Prishtinë për caktimin e masës së paraburgimit kundër Skënder Krasniqit, si i dyshuari për vrasjen e të birit, Albert Krasniqi.

Ndërkohë, sa i përket ishbashkëshortes, ajo ka qenë prezente në varrimin e Albertit. Kujtojmë që at e bir ishin biznesmenë të suksesshëm në fushën e ndërtimeve.

/Panoramaplus.al