Sylvester Gardenzio Stallone lindi më 6 korrik 1946, është aktor, regjisor si dhe skenarist amerikan. Sukseset më të mëdha arriti me interpretimin e roleve Rocky dhe Rambo.

Pra, shumë e njohin Sylvester Stallonen për nga paraqitja e tij e shkëlqyer si një boksier në një film fitues të shumë çmimeve, “Rocky”, ku Rocky Balboa lufton për të mbijetuar në rrugët e Filadelfias.

Dhe këtë e bëri për herë të parë pikërisht 46 vite më parë, më 21 nëntor 1976, kur doli “Rocky” në sallat e kinemasë dhe ndryshoi përgjithmonë historinë e Artit të Shtatë.

U xhirua në 28 ditë me një buxhet me më pak se 1 milion dollarë, por u bë një sukses planetar dhe Sylvester Stallone, skenarist dhe aktori protagonist, u bë yll botëror gjatë një nate.

Në total Rocky mblodhi 225 milionë dollarë dhe i dha jetë pesë serive: Rocky II, Rocky III, Rocky IV, Rocky V, Rocky Balboa dhe një film tjetër “I lindur për të luftuar”, i realizuar në 2015.
Titulli i parë historik i filmit ka fituar tre çmime Oscar, midis të cilëve për filmin dhe regjisorin më të mirë.

Falë Rocky, Stallone u bë i treti në historinë e kinemasë, pas Charlie Chaplin dhe Orson Welles, që mori nominimin e Oscar-it edhe si aktor dhe skenarist për të njëjtin film.

Kujtojmë këtu që, në realitet, vitin 2012, djali i Sylvester Stallone, Sage, i cili ka luajtur në një tjetër film të sagës Rocky, u gjet i vdekur në apartamentin e tij në Los Angeles, nga një mbidozë ilaçesh, si shkak i depresionit.

Sage Moonblood Stallone ishte djali i madh i Sylvester Stallone dhe luajti bashkë me babanë e tij në dy filma, “Rocky IV” dhe “Daylight”.

Ai ishte djali i madh i dy fëmijëve që Stallone pati me gruan e parë Sasha Czack.

Stallone u nda nga nëna e Sage, Czack në vitin 1985 pas 11 vitesh bashkë. Ata kanë edhe një djalë tjetër Seargeoh.

Sage, tashmë i ndjerë, i cili u rrit nga nëna e tij, pas ndarjes së prindërve, kishte krijuar një distancë me të atin.

Kur luajti me të atin në filmin “Rocky”, në skenar kishte edhe një pjesë që kishte lidhje me jetën e tij personale.

“Kur i bërtita në film me fjalët: “Ti kurrë nuk kalove kohë me mua! Ti kurrë nuk kalove kohë me nënën time!”, kjo ishte ajo që unë vërtetë mendoja për të”, pati deklaruar Sage për revistën “People” në vitin 1996.
Në vijim, do të mund të lexoni mesazhin që Sylvester i dha djalit si personazh në filmin “Rocky”, që në fakt duhet t’ia kishte dhënë edhe birit të tij në jetën e vërtetë:

“Nuk do ta besosh këtë gjë, por ti ishe sa pëllëmba ime dikur. Unë të ngrija dhe i thoja mamasë tënde:

“Ky djalë do të bëhet djali më i mbarë në botë. Ky djalë do të bëhet dikush, më i mirë se çdo person tjetër”.

Pastaj ti u rrite si një djalë i mbarë. Ishte shumë bukur të të shihnim të rriteshe.

Çdo ditë ishte si një privilegj, derisa erdhi koha që ti u rrite dhe duhet t’ia dilje vetë mbanë në jetë, gjë që e bëre, por diku gjatë rrugës, ti ndryshove.

Ndalove së qenuri vetvetja. Ti fillove të lejosh të tjerët të të drejtojnë gishtin e të të thonë se ti nuk je i mirë dhe kur gjërat u vështirësuan, ti ia hodhe fajin dikujt tjetër e jo vetes.

Dua të të them diçka që ti e di tashmë. Bota nuk është një fushë e bukur me lule. Është e mbushur me sfida dhe nuk do t’ia dija aspak se sa i fortë je.

Do të të godasë fuqishëm, do të të rrëzojë në gjunjë dhe do të të lërë në atë pozicion, derisa ti ta lejosh.

As unë, as ti, askush tjetër nuk mund të të godasë aq shumë sa jeta.

Nuk ka shumë rëndësi se sa fort i godet të tjerët, por se sa fort të godasin ty dhe ti sërish ecën përpara.
Kështu përcaktohet fitorja! Ndaj, nëse e di se sa vlen, kërko gjërat që meriton në jetë.

Por ti duhet të përpiqesh gjithmonë të triumfosh, jo të drejtosh gishtin drejt të tjerëve dhe të thuash se nuk ia dole dot, për shkak të atij, apo asaj, apo kujtdo.

Frikacakët e bëjnë këtë gjë dhe ti nuk je frikacak. Ti je më i mirë se aq.

Unë do të të dua gjithmonë, pavarësisht gjithçkaje që ndodh. Ti je djali im dhe ke gjakun im.

Ti je gjëja më e mirë e jetës sime. Por deri në momentin që ti të nisësh të besosh tek vetja, nuk ke për të pasur një jetë”.

E përgatiti: U.V. – ObserverKult