Max Verstappen shënoi fitoren e tij të parë të sezonit në fund të një dueli shumë të ashpër me Charles Leclerc, i cili zgjati gjatë të gjithë garës, por që i drithëroi të gjithë në pesë xhirot e fundit. Në fillimin e xhiros së 47 dhe të tretin nga fundi, kampioni në fuqi arriti të kalonte pilotin e Ferrarit pikërisht në vijën e finishit, i cili – në fund – nuk mundi të replikonte edhe për shkak të një flamuri të verdhë në sektorin e parë. Carlos Sainz kompletoi podiumin përpara Sergio Perez, që pavarësisht se u nis i pari ishte i pafat në fazën e pit stop. George Russell përfundon i pesti me Mercedes, ndërsa Lewis Hamilton e mbylli vetëm i dhjeti.

Episodi vendimtar ndodhi në fillim të xhiros së 47, kur Verstappen parakaloi Ferrarin pikërisht në vijën e finishit. Për pilotin nga Monaco gjërat u komplikuan në xhiron që pasoi, kur një flamur i verdhë në sektorin e parë (aksident midis Albon dhe Stroll në kthesën e parë) e pengoi të sulmojë me DRS në pikën më të favorshme. Charles, në fakt, provoi gjithçka, por Verstappen ishte shumë gjakftohtë dhe mbajti situatën “në kontroll”.

Max shënoi suksesin e tij të parë këtë sezon, Leclerc megjithatë konsolidoi lidershipin e tij në Kampionatin Botëror, ndërsa Sainz “klonoi” podiumin e Sakhir. Russell e mbylli garën i pesti përpara Ocon, Norris, Gasly, Magnussen dhe një Hamiltoni asnjëherë protagonist.