Përfaqësuesja e Shqipërisë në Eruvision, Besa Kokëdhima, ka bërë publike versionin përfundimtar të këngës me të cilën do të prezantohet në Festivalin Europian që do të mbahet në Malmo të Suedisë.

Kënga duket se është rinovuar tërësish, që me titullin, që do të jetë ndryshe. Versioni i ri nuk titullohet “Me zemër n’dor”, por “TiTAN”. Ka edhe disa ndryshime në tekstin që kësaj here ka ardhur në gjuhën angleze, që sipas këngëtares, bëhet për të ruajtur origjinalitetin dhe përcjelljen në mënyrë efektive të mesazhit.

Rindërtimi synon të rrisë koherencën e këngës, duke eliminuar kalimet e papritura midis pjesëve të ndryshme. Ndryshe nga Festivali i Këngës, ku ka një orkestër live, Besa do të ketë vetëm këngëtarë mbështetës dhe sfond në Eurovizion, kështu, ka të ngjarë që rinovimi ta ketë marrë në konsideratë edhe këtë.

Kënga ruan ende disa elemente autentike shqiptare, për të mbajtur autenticitetin e saj, e duke tërhequr gjithashtu një audiencë më të gjerë. Pak orë pas publikimit, kritikë të artit e kanë vlerësuar maksimalisht këngën e Besës, duke argumentuar se Shqipëria mund të jetë surpriza e këtij festivali.

/rtsh.al/