Ish-shtëpia e Gianni Versace në Manhattan ka dalë në shitje për 70 milionë dollarë.

Dizajneri i ndjerë i modës e bleu rezidencën me shtatë dhoma gjumi në vitin 1995 dhe e rinovoi plotësisht nga brenda, sipas Sotheby’s International Realty.

“Rezidenca, e ndërtuar në vitin 1950, i ofron blerësit mundësinë për të jetuar si mbret dhe të zotërojë një pjesë të pasurive të paluajtshme dhe historisë së modës”, thuhet në listë.

Me 17 dhoma të shpërndara në gjashtë kate, prona ka pamje nga Fifth Avenue dhe kufizohet me Central Park. Dyshemeja është me mermer italian dhe parket austriak. Ka pesë oxhaqe, mure dhe tavane të lyera dhe mozaik.

Versace e mobiloi shtëpinë në një stil të veçantë barok italian.

“Vizioni i Versace-s zbulohet në 4 katet e para, ku secili paraqet shijen legjendare të stilistit dhe përshkon shtëpinë”, shton lista.

Çdo kat i rezidencës ka një temë të ndryshme.

Tarraca e çatisë ofron një pamje të horizontit të qytetit të Manhatanit.

Kati i katërt ofron një spa që lista e përshkruan si “një nga më madhështoret në qytet”, dhe katet e pestë dhe të gjashtë kanë dhoma gjumi dhe një dhomë mediatike të stilit maroken.

Versace ishte një nga figurat më me ndikim në modë në shekullin e 20-të. Ai u shfaq me koleksionin e tij të parë të pavarur në Milano në vitin 1978 dhe e themeloi markën me vëllain e tij, Santo, dhe motrën e tij, Donatella. Modelet e tij janë të njohura për siluetat joshëse dhe janë veshur nga mbretërit e kulturës pop, përfshirë Naomi Campbell, Jennifer Lopez dhe Elton John.

Versace u qëllua për vdekje në shkallët e vilës së tij në Miami Beach në vitin 1997. Që nga vdekja e tij, Donatella Versace ka vazhduar të udhëheqë vizionin krijues të markës – tani nën kompaninë amerikane Capri Holdings, që e bleu markën në vitin 2018.