Vazhdojnë hetimet për zhdukejn e shtetasit turk, i cili ishte kapiten i jahtit luksoz që u gjet i braktisur në portin e Shëngjinit.

Mësohet se Policia dhe Prokuroria e Lezhës ka nisur verifikimet për biznesmenin turk Nedin Akyuz, njëherazi edhe pronari i jahtit luksoz, i cili erdhi në Shqipëri për të tërhequr jahtin.

Pavarësisht se biznesmeni tregoi lëvizjet e kapitenit dhe bisedën e fundit të kryer me të, sipas Report TV, hetuesit po verifikojnë ndonjë konflikt të mundshëm mes tyre.

Të njëjtat burime sqaruan se deri më tani nga verifikimet e kryera, por edhe nga të dhënat që grupi hetimor ka siguruar nga policia turke, nuk rezulton se kapiteni Yavuz të ketë precedent penalë.

Verifikime po kryhen edhe për vërtetësinë e deklarimit që kapiteni kishte kryer në portin e Tivarit në Malin e Zi, se në bord ndodhej i vetëm dhe destinacioni final i tij do të ishte ishulli i Korfuzit në Greqi./Gazeta Liberale