Arjan Korkaj flet për Arjan Çanin: Pse e mbylli emisionin e famshëm ku këndoja live, shpresoj tani të mos shohim më ujqër rrugëve!

Nga Klotilda Harka

Arjan Korkaj është këngëtari i talentuar, që u bë më i njohur në “Zonë e Lirë”, me interpretimet “live” duke ndezur atmosferën e programit të Arjan Çanit. Tashmë që “Zonë e Lirë” nuk po transmetohet këtë sezon e në ekranin e “Tv Klan”, Arjan Korkaj flet për mbylljen e emisionit të famshëm dhe gazetarin, që ai thotë se i hapi dyert në Shqipëri. Artisti nga Labëria që prej vitesh jeton në Shtetet e Bashkuara të Amerikës, rrëfen gjithçka për punën me kamionin e tij, për bashkëpunimet me muzikantë me emër, koncertet ku merr pjesë, prapaskenat e botës së muzikës, dhe baladat për dashurinë që i burojnë nga shpirti….

Prej vitesh që jeton në Amerikë, por që nuk e ndan asnjë moment këngën nga jeta jote. Si do e përshkruaje ritmin e jetës atje, si është një ditë e jotja?

Në radhë të parë, përshëndes të gjithë bashkatdhetarët tanë kudo që jetojnë, sepse ata më dhanë mundësinë të jem ky që jam sot! Sa i përket jetës sime të përditshme është që punoj me kamionin tim me shumë sakrificë dhe lodhje të pafundme rrugëve, krahas udhëtimit kuptohet që muzika nuk ndalohet kurrë.

Të gjithë e ëndërrojnë Amerikën, ti çfarë mund t’u thuash atyre që dëshirojnë të nisin një jetë të re aty?

Patjetër që Amerika ka shpresa dhe mundësi për ata që duan të punojnë, këtu je i lirë të bësh atë që do dhe mundësitë janë. Kurse në Europë nuk besoj se janë këto mundësi.

Gjithmonë ke besuar te suksesi i këngës së pastër popullore shqiptare. Cilat krijime do të veçoje si pasuritë e repertorit tënd apo muzikës shqiptare?

Do veçoja këngët e kohës së Komunizmit, kohë që nxori artistë të vërtetë. Nga ata unë ende mësoj, pasi lanë pasuri të pavdekshme. Si këngë janë këngë njëra më me vlerë sesa tjetra. S’di kë emër të them më parë! Sa për këngët që këndoj unë, do të thoja të gjitha këngët e mia, si baladat ashtu dhe ato popullore. Besoj një këngë e pavdekshme do jetë kënga “Mall” për të gjithë emigrantët shqiptarë. Kjo këngë është shkruar si tekst dhe muzikë nga Sokol MARSI, i cili mbiemrin e meriton me gërma të mëdha për veprat, që Koli bën.

Në tregun e muzikës si do e përshkruaje garën femra-meshkuj, cilët janë më të kërkuarit në koncerte e festa familjare?

Kjo vërtet është një pyetje e ndërlikuar. Unë besoj se këngëtarët tanë po bëjnë atë lojë me të njohurit e tyre, plus po përshtaten me pagesa nënvlerësuese në treg. Ia bëjnë vetes këtë duke ulur njëri-tjetrin mbas shpine dhe me mesazhe ndaj atyre që organizojnë. Më vjen vërtet turp të shkoj në një koncert pa marrë pagesën time që meritoj! Më mirë punoj siç po punoj, sesa të shkoj nëpër tavolina për t’u lypur para klientëve nëpër lokale kafesh.

Meqë jemi këtu, flitet se ti paguhesh 5 mijë USD për një koncert. Sa e vërtetë është?

Unë nuk shkoj më nëpër dasma, shkoj vetëm nëpër koncerte të mëdha kur më shkruajnë organizatorët e një eventi. Sa për pagesën s’e kam problem ta pranoj, që po është e vërtetë, unë marr 5.000 USD.

Nga bashkëpunëtorët e tu duket se ke gjetur më shumë veten tek krijuesi Sokol Marsi, siç e përmende më sipër. Cilat krijime do të veçoje nga bashkëpunimi juaj?

Me Kolin kam më shumë për të thënë. Koli është ARTIST i lindur për mendimin tim. Këngët m’i ka bërë të gjitha me kuptim të papërshkruar emocionalisht, por për mua si Arjan, është kënga “MALL”. Sa për krijuesit e tjerë, patjetër ka të mirë dhe këtu do të veçoja bashkëpunimet që kam bërë dhe me Klodian Qafokun, etj. Shumë i mirë është dhe Adi Hila (labi ynë), dhe Edi Balili.

Këndon kryesisht popullore të Shqipërisë së Jugut, popullore qytetare apo popullore dasmash. E ke menduar ndonjëherë të marrësh pjesë në ndonjë festival të muzikës së lehtë apo moderne, siç kanë bërë edhe Gena, Eli Fara, etj?

Unë këndoj këngën qytetare vlonjate dhe baladat. Unë s’mund të këndoj ç’do lloj kënge, nuk jam këngëtar që i bëj të gjitha. Sa për Festivalin e këngës se lehtë, më besoni se po, do merrja pjesë me një baladë. Por gjithmonë po më thirrën, jo të shkoj me mik. (Qesh)

Bashkëpunimet mes këngëtarëve janë shumë në modë. Ti ke një emër këngëtari apo këngëtareje që do të doje të bëje duet?

S’e besoj se e konsideroj të nevojshme. Nëse një këngë është e mirë nga ty ngelet nga ty, plus që unë s’e kam në natyrë të lus të tjerët për një gjë që mund të bëhet e bukur si bashkëpunim. Të biem dakord sot dhe të nesërmen të merren me llafe e të ndërrojnë mendje, për mua është nivel i ulët për ata kolegë.

Në rrugëtimin tënd si këngëtar nga viti 1995, cilën do të konsideroje ndodhinë më të bukur dhe atë që të ka lënë shije të hidhur gjatë punës tënde?

Ndodhia më e bukur vërtet për mua ka qenë kur këndoja në skenë dhe shikoja dy sy që lotonin me një baladë. Pasi e pyeta atë vajzë s’më tha se ishte e lënduar, por ishte përlotur nga mënyra se si e interpretoja atë këngë. Kurse rasti më i hidhur ishte kur dola në skenë me shapka pa e kuptuar, që nga nxitimi s’i vesha këpucët.

Në Shqipëri je njohur edhe për interpretimin e bukur të këngëve greke. Këngët e cilëve artistë grekë i këndon me shpirt, dhe me cilët artistë të njohur grekë ke kënduar atje?

Po të flasim për në Greqi, patjetër që i këndoj me shpirt dhe mbushem me tekstet dhe muzikën e tyre (jo të ngatërroj këngën me politikën e tyre të poshtër}. Por si këngë, si vepër muzikore flas gjithmonë, për bashkëpunime kam pasur me të madhin SFAKIANAKI, N. THODHORIDHU, dhe me me mjeshtrin PASKALI TERZI. Nga ata unë mësova si të bëj rrugëtimin tim muzikor.

Interpretimin e bukur live të këngëve greke dhe jo vetëm e ke dëshmuar në tek “Zonë e lirë”, te Arian Çani. Si u ndjeve kur more vesh se ai s’do e bënte programin e famshëm këtë sezon në “Tv Klan”, dhe çfarë di për rikthimin e tij?

Çani vërtet ishte një mundësi shumë e mirë për mua, dhe për këdo që donte të reklamonte punën e tij. Besoj se është një vendim i tij që e mbylli, ndoshta për diçka më të mirë për të. Shpresoj me këtë rast mos të shohim më ujqër të rrugëve. (Qesh)

Shumë këngë ti ia dedikon dashurisë, po çfarë është dashuria për ty?

Dashuria është jetë dhe vuajtje shpirtërore. Pa dashuri s’ka jetë, s’ka motiv, s’ka kuptim asgjë. Por fatkeqësisht është rrugë e shkurtër, kur e ke përditë afër, dhe vuajtje e përjetshme kur s’e jeton gjatë atë njeri… Prandaj i bëj dhe baladat me tekste shpirtërore, dhe më dalin nga shpirti kur i këndoj.

/www.story.al