Dave Mustaine është një prej emrave më të mëdhenj të rokut në botës. Një ditë më parë, ai ka konfirmuar se është diagnostikuar me kancer në fyt.

Vokalisti dhe kitaristi i grupit të famshëm “Megadeth”, bëri një deklaratë në rrjetet sociale, ku u shpreh se ka kaluar shumë pengesa në jetë dhe kjo është vetëm një prej tyre.

“Është sigurisht diçka që duhet respektuar dhe duhet përballuar me kokën lart- por unë kam kaluar plot pengesa. Po punoj nga afër me doktorët dhe kemi bërë një plan trajtimi i cili ata thonë se ka rezultuar i suksesshëm në 90% të rasteve. Trajtimi ka nisur tashmë”, shkruan Mustaine në postimin e tij.

Tani që ai ka nisur trajtimin e sëmundjes, grupit i është dashur që të anulojë të gjitha datat e koncerteve që kishin parashikuar. Në të njëjtën kohë, Mustaine njoftoi se kolegët e tij, basisti David Ellefson dhe kitaristi Kiko Loureiro, po punojnë për një album të ri i cili do të jetë vazhdimi i albumit “Dystopia” në 2016-n.

Ndërkohë kujtojmë se Dave Mustaine u bë i njohur teksa ishte pjesë e grupit të famshëm “Metallica” nga 1981 deri në vitin 1983. Më pas ai vendosi që të krijonte grupin “Megadeth” me të cilin u nominua 12 herë në “Grammy”.