Mes stomatologjisë dhe televizionit, ku tashmë bën emisionin e tij të shëndetësisë, Dijedon Musa i “Big Brother 8” njihet në Kosovë dhe Shqipëri si “doktori i matur”. Pasi e ka provuar çdo të thotë të jesh pjesë e showbiz-it, ai ka preferuar që ta mbajë jetën e tij private larg saj, pasi për të siguria në një marrëdhënie vjen me kohën. Por historia e dashurisë, që po jeton aktualisht, e ka futur në një gjendje të paimagjinuar. Për “Panorama Plus”, ai rrëfen për herë të parë lidhjen e veçantë që mbajti larg medias me kolegen që njohu në klinikë.

Pas shkëputjes nga jeta publike duket se i je përkushtuar profesionit të stomatologut. Të ka shërbyer fama që fitove në “Big Brother” për të tërhequr më shumë klientë?
Po, i jam kushtuar mund të them profesionit tim. Që prej dy vitesh, kam filluar specializimin për kirurgji të fytyrës dhe kokës, duke qenë se për t’u bërë kirurg i këtij regjioni, duhet patjetër të jesh stomatolog. Është, (nëse mund ta quaj shkollë) 5- vjeçare e unë tani sa kam filluar vitin e tretë. Jam fokusuar totalisht në këtë fushë të mjekësisë, sepse e kam dashur gjithmonë. Në këtë pjesë nuk besoj që më ka ndihmuar fama, sepse mjekësia është një profesion që nuk varet shumë nga marketingu, por varet nga suksesi dhe rezultatet. Por padyshim që fama më ka ndihmuar në televizion, aty ku punoj dhe moderoj një emision timin tashmë në Kosovë.

Në shtëpinë e “Big Brother” ishe ai i veçanti nga të gjithë, duke qenë se u prezantove si djali serioz dhe i qëndrueshëm në marrëdhënie me vajzat. Si ka shkuar jeta jote private këto kohë, dole në takim me shumë vajza deri sa gjete të duhurën?
Më shumë më vlerësuan si serioz, se sa u paraqita unë vetë. Përgjithësisht në çdo sferë të jetës ka pasur ndryshime, falë të cilave mëson gjëra e aftësohesh për të dalluar të mirën dhe për të zgjedhur më të mirën.

Pra, po thua se e ke gjetur me të mirën. Kush është ajo dhe si jeni njohur?
Gjërat e bukura vijnë ngadalë, besoj unë. Është një kolege e imja që jemi njohur në klinikë. Pastaj avash-avash e kemi zhvilluar marrëdhënien. Por do e shpalos me kalimin e kohës.

Gjithmonë në intervistat që kemi bërë bashkë je shprehur se i jep rëndësi ndjenjës dhe vetëm kur të ndieje për dikë realisht do të dilje hapur. Mund të themi se ke rënë në dashuri?
Pikërisht kjo ishte arsyeja që nuk e kemi bërë publike deri tani marrëdhënien. Siguria është diçka që vjen me kohën, por njëkohësisht edhe diçka që nuk mjafton kurrë. Për dashurinë nuk ka njësi matëse dhe rrjedhimisht nuk mund të vlerësojmë asnjëherë se sa shumë jemi të dashuruar. Por unë veten time po e shoh në një gjendje të pa imagjinuar e të paprovuar më parë, sa i përket dashurisë.

Çfarë të tërheq te partnerja jote dhe pse zgjodhe një vajzë të panjohur në publik?
Më tërheq çdo gjë, absolutisht çdo gjë që posedon. Sepse dashuria dhe ajo shkëndija e parë për dikë nuk pyet se kush është apo çfarë pune bën, por të vjen natyrshëm.

Keni bërë plane për t’u martuar?
Hmmm, plane tamam, tamam konkrete, akoma jo. Për asgjë deri më tani nuk kemi bërë plane, kështu që vazhdojmë t’i bëjmë gjërat ashtu siç do i ndiejmë. Por që do të ketë ndryshime besoj.

Një stomatolog është aq tërheqës sa të tundojë pacientët e tij?
(Qesh) Të gjithë profesionistët e në veçanti profesionistët e shëndetit që kanë kontakt direkt me pacientë, nuk duhet asnjëherë të shkelin mbi kodin etik, pra, nuk duhet që konteksti i bisedës apo komunikimit të ndërsjellë me pacientë të dalë jashtë çështjes së shëndetit.

Nga këndvështrimi i stomatologut, puthja për ty është një shkëmbim i thjeshtë që mund ta bësh me këdo, apo rreziku fillon nga një puthje?
Puthja mendoj që është pika kulmore e të shprehurit në mënyrë fizike të asaj çfarë ndjejmë ndaj dikujt. Në momentin kur nuk dalin dot fjalët, puthja e shpreh atë që fjalët nuk munden. Prandaj, diçka e bukur mund të kthehet në një rrezik, nëse i japim rëndësi puthjes e jo ndjenjës.

Tani që je tërhequr më shumë në jetën tënde jashtë vëmendjes, si të duket bota e showbiz-it?
Bota e showbiz-it është botë interesante. Për shumicën është një dëshirë e madhe e për dikë mund të duket e lodhshme. Është botë që ecën shumë shpejt, dhe përveçse të lodh, duhet edhe të jesh i kujdesshëm.

Vazhdon miqësinë me ndonjë nga ish-bashkëjetuesit në “Big Brother”, me cilët shkëmbeni informacione se si shkon jeta juaj?
Po mbaj kontakte të vazhdueshme, në veçanti me Stilianin dhe me Veselin, që takohemi kur kemi kohë./Panorama Plus