Francesca Bergesio, fituesja e kurorës së Miss Italia 2023 dhe vajza e senatorit të Ligës Veriore, Giorgio Maria Bergesio, është përballur me kërcënime të rënda në rrjetet sociale.

Një 32-vjeçar nga Lombardia, duke përdorur një profil të rremë në Facebook me emrin e një gruaje, dërgoi mesazhe tronditëse ku i shkruante: “E di ku jeton, do të vij të të përdhunoj, do të të vras ty dhe babanë tënd.”

Ngjarja ndodhi në dhjetor 2023 dhe çoi në nisjen e një hetimi të përbashkët nga Policia Postare dhe Skuadra Fluturuese e Cuneos, nën drejtimin e zëvendësprokurores së Astit, Laura Deodato. Autori u identifikua dhe përfundoi në gjyq me akuzën e kërcënimeve të rënduara, por dënimi prej tre muajsh burg u konvertua në 180 orë shërbim komuniteti, pasi pranoi fajin dhe ofroi kompensim financiar.

Në një rrëfim të sinqertë, Francesca tregoi:

“Isha e frikësuar. Ai shkruante se e dinte ku jetoja. E imagjinoni sa e vështirë është ta përballosh këtë kur je vetëm?”
Ajo shtoi se mesazhet e para alarmuese i kishte lexuar nëna e saj, ndërsa administronte profilin në Facebook në ditët e para të suksesit të saj si Miss Italia.

Bergesio theksoi se ky përjetim e ka bërë më të ndërgjegjshme për rëndësinë e betejës kundër dhunës me bazë gjinore – një temë që ajo e kishte përzgjedhur edhe gjatë konkurrimit për kurorën, përmes një monologu të dedikuar.

“E raportova për të mirën e të gjithëve. Sot jam edhe më e bindur për rëndësinë e kësaj beteje,” deklaroi ajo.

Ngjarja ka ringjallur debatin mbi sigurinë e grave në internet dhe urgjencën për të trajtuar seriozisht kërcënimet virtuale, të cilat shpesh kthehen në ankth dhe frikë reale për viktimat.

tpz.al