Vajza adoleshente e liderit të Koresë së Veriut, Kim Jong Un është duke u përgatitur si të qeverisë vendin.

Sipas agjencisë së spiunazhit të Koresë së Jugut, pasardhësja po trajnohet nga babai i saj dhe kabineti qeveritar.

Ju Ae u shfaq për herë të parë në publik dy vite më parë dhe shumë zëra qarkulluan se ajo do të jetë liderja e ardhshme.

Ju Ae, e cila është quajtur “vajza e respektuar” dhe “fëmija e dashur” nga media shtetërore, është një kandidate për të qenë pasardhësja në familjen Kim që ka drejtuar shtetin që nga themelimi i tij në fund të viteve 1940.

“Koreja e Veriut ka lënë të kuptohet Kim Ju Ae si një kandidate për pasardhëse dhe po merr mësime nga babai i saj”, u tha gazetarëve ligjvënësi Lee Seong-kweun i Partisë Popullore në pushtet, pas një sesioni parlamentar. “Ata kanë rritur nivelin e propagandës dhe shpeshtësinë e paraqitjes së saj, duke marrë parasysh reagimin e publikut ndaj saj”, tha Lee.

Ju Ae u shfaq për herë të parë në mediat shtetërore të Koresë së Veriut në nëntor 2022 me një pallto të bardhë dimërore, duke mbajtur dorën e babait, teksa po shihte një rakete me aftësi bërthamore të projektuar për të zhdukur një qytet amerikan.

Që atëherë ajo është shfaqur në teste armësh, në funksione shtetërore dhe madje edhe në aktivitete sportive, gjithmonë me të atin.

Roli i vajzës së Kim-it në propagandën shtetërore duket se po i tregon publikut se një brez tjetër pret të drejtojë dinastinë familjare dhe se do të mbështetet në armët bërthamore për mbijetesën e saj.

Agjencia e spiunazhit të Koresë së Jugut e ka përcaktuar moshën e saj rreth 11 vjeç dhe beson se ajo është fëmija i dytë nga tre fëmijët mes Kim dhe gruas së tij, Ri Sol Ju.

Një nga momentet më të mëdha të Ju Ae ishte në shkurt 2023, kur ajo iu bashkua nënës dhe babait të saj në një festë për nder të ushtrisë dhe u vendos përpara dhe në qendër në një foto me disa nga anëtarët më të fuqishëm të forcave të armatosura.

voxnews.al