Tri vjet më parë, i madhi Piro Mani ndërroi jetë në SHBA.

Ai prehet larg Shqipërisë, ndërsa aktorja e madhe Roza Anagnosti, në një letër të saj thotë se është në nderin e shtetit shqiptar, që ai të prehet në dheun mëmë.

“KUJTESË

Pirro Mani, Artisti i Popullit, Nderi i Kombit, bashkëshorti, babai dhe artisti i papërsëritshëm shumë dimensional, u largua nga kjo jetë më 3 qershor 2021.

Figura të tilla vijnë shumë rrallë për një komb. E kujtoj me mall e mirënjohje për atë vlerë që i dha teatrit shqiptar me një bujari të rrallë.

Kam qenë e privilegjuar dhe me fat si aktore, që pata mundësinë të punoj nën regjinë dhe drejtimin e tij.

Ishte një akademi e vërtetë. Teatri foli shqip si asnjëherë. Karakteret, emocionet që përçonte e ngrinin publikun peshë.

Edhe në kohë të vështira Pirro bëri spektakël të jashtëzakonshëm, me art për tu admiruar.

Me të drejtë bashkëshortja, aktorja e shquar, Pavlina Mani, nuk gjen ngushëllim për ikjen e tij.

Një artist i madh si ai, e kishte edhe shpirtin e madh. Prandaj duhet të studiohet, të shkruhet dhe të dokumentohet vepra dhe jeta e tij.

Ishte një busull për ne, po do të jetë frymëzim për artistët e rinj dhe më tej.

Është në nderin e shtetit shqiptar që figura të tilla me vlera kombëtare të prehen në dheun mëmë.

I përjetshëm kujtimi dhe vepra e tij.

Me respekt

Roza Anagnosti”, shkruan ajo.

shqipet.al