Autoritetet italiane kanë njoftuar arrestimin e një bosi të lartë të mafies Ndrangheta pas gati 5 vitesh në arrati. Pasquale Bonavota, 49 vjeç, i cili ishte pjesë e listës së kriminelëve më të rrezikshëm kërkohej që nga nëntori 2018.

Në atë kohë i kishte shpëtuar një urdhër-arresti për vrasje dhe pjesëmarrje në organizatë mafioze të lëshuar nga një gjykatës në Kalabria në Italinë jugore. Ai u arrestua të enjten në mëngjes në qytetin port verior të Genovas. Mediat raportuan se Bonavota ishte duke dalë nga katedralja e qytetit kur u arrestua dhe mbante një letërnjoftim false.

Bonavota konsiderohet truri i klanit Bonavota të Ndrangheta, i cili përfshin dy vëllezërit e tij, me bazë në zonën Sant’Onofrio të provincës kalabreze të Vibo Valentia. Klani vepron gjithashtu rreth Romës dhe në rajonet veriore të Piemonte dhe Liguria, e cila përfshin Genova.

Ndrangheta është mafia më e fuqishme dhe më e pasur e Italisë, që kontrollon pjesën më të madhe të kokainës që derdhet në Evropë. Ajo operon në më shumë se 40 vende. Ajo është zgjeruar me shumë sukses përtej zonave të saj tradicionale të trafikut të drogës dhe huadhënies, duke përdorur tani kompani guaska dhe drejtues për të riinvestuar fitimet e paligjshme në ekonominë legjitime.

Bonavota u zhduk në arrati pak pasi u dënua nga një gjykatë më e ulët me burgim të përjetshëm për dy vrasje të kryera në 2014 dhe 2004 të një anëtari të rangut më të ulët të klanit të tij dhe një shefi të një klani rival. Ky dënim u anulua në vitin 2021 nga një gjykatë e apelit teksa ai ishte në arrati.
Bonavota ishte i dyshuari i fundit i arratisur i përfshirë në çështjen masive kundër Vibo Valentia ‘Ndrangheta që çoi në gjyqin e 2021 kundër më shumë se 300 anëtarëve të dyshuar të mafias dhe ndihmësve të tyre. Gjyqi është në vazhdim.

Në atë aktakuzë, Bonavota përshkruhet si një lider që “merrte vendimet më të rëndësishme” së bashku me bosët e tjerë të lartë të Ndrangheta “kujdesej për interesat e organizatës në zonën e Romës dhe sektorët e lojërave të fatit dhe trafikut të drogës”.

Arrestimi i Bonavota vjen 3 muaj pas kapjes së profilit të lartë të bosit të mafias siçiliane Matteo Messina Denaro. Shefi i Cosa Nostra kishte 30 vjet që ishte i arratisur. ©LAPSI.al