Amal Alamuddin hyri në jetën e George Clooney krejt papritur dhe ndryshoi çdo gjë në më pak se një vit.

Ai, beqari i famshëm kishte zbuluar se dashuria s’bënte për të dhe pikërisht në kohën kur hoqi dorë prej saj, gjeti atë që s’e priste.

Nëse e keni harruar, aktori ka qenë i martuar edhe më herët në jetën e tij. Gruaja e parë ishte aktorja Talia Balsam, me të cilën qëndroi nga viti 1989 deri në 1993.

Në korrik të 2013-it, fati vendosi të ndalojë tek shtëpia e aktorit në Como të Italisë dhe gjërat ndryshuan përgjithmonë. Ai as që ja kishte idenë kush ishte Amal, por një mik i përbashkët i thotë aktorit: “Po vij drejt shtëpisë tënde, a mund të marr një mikeshën time?” “I thashë se mund ta merrte patjetër dhe pas disa minutash marr një telefonatë nga agjenti im që më thotë: ‘E takova atë gruan që po vjen tek shtëpia jote, të cilën ti do ta martosh.’”

George-it nuk ju desh as të linte shtëpinë e tij për të takuar dashurinë e jetës. Prindërit e aktorit ndodheshin po në atë shtëpi, gjë e bëri edhe më të përkryer momentin.

Takimi i parë ndodhi dhe në fund, ata shkëmbyen email-et me njëri tjetrin dhe premtuan se do të mbeteshin në kontakt. Kështu folën për muaj me radhë, por ishte takimi në Londër ai që i çoi gjërat në tjetër nivel. Aktori qëndroi me Amal për 6 javë dhe aq u deshën për t’u bërë të pandashëm.

Në prill të 2014-ës, George vendos t’i propozojë partneres, me të cilën ishte kokë e këmbë i dashuruar.  “Mbaj mend që kam qëndruar plot 20 minuta në gjunjë, duke pritur që ajo të më thotë PO, sepse ishte e shokuar.”

Në po të njëjtin vit, ata u martuan në Venecia. Asokohe, aktori as që e mendonte se do të kishte ndonjëherë fëmijë dhe nga ana tjetër Amal ishte shumë dakord që familja e saj të ishte vetë George. Edhe kësaj here gjërat ndryshuan.

Në 6 qërshor të 2017-ës ata u bënë prindër të binjakëve Ella dhe Alexander dhe sot, Clooney është i bindur se “puna” më serioze në jetën e tij është të jetë rritja e mirë e fëmijëve.

Vetëm prania e Amal-it në jetën e tij e bëri botën e George-it të ndryshonte plotësisht. Juristja më e famshme, ndryshoi mënyrën e tij të perceptimit, besimet dhe idetë fikse.  “Para se të kishim fëmijët, mendoja se ajo ishte e bërë vetëm për mua. Isha i bindur që do ta jepja jetën për të, sepse kisha takuar dikë jeta e të cilës për mua kishte më shumë kuptim sesa e imja. S’e kisha përjetuar diçka të tillë më parë.”- përfundon Clooney, që dhe pas kaq vitesh bashkë, e sheh me të njëjtin pasion gruan që i ndryshoi jetën.