Mbrëmjen e djeshme hapi siparin festivali i njohur i muzikës italiane ‘Sanremo’. Ky festival është një ndër më të komentuarit jo vetëm në Itali, por edhe në vendet fqinje. Këngëtarët që konkurrojnë për çmimin e madh, ditën e djeshme u munduan të japin maksimumin në skenë, por siç duket disa prej performancave nuk janë pëlqyer shumë nga publiku. Ndër të parët që ka kritikuar festivalin e ‘Sanremo’ ishte dhe moderatori i njohur shqiptar, kantautori dhe producenti i “Kënga Magjike”, Ardit Gjebrea.

Mbrëmjen e djeshme ai ka publikuar disa nga performancat dhe njëra prej tyre nuk i ka pëlqyer aspak. Bëhet fjalë për këngëtarin Achille Lauro, i cili këtë vit konkurron me këngën “Rolls Royce”. “Dhe mos më thoni sa stonojnë këngëtarët tanë. Hajde ‘Sanremo’, ka shkruar Gjebrea bashkëngjitur një foto të artistit.

Gjithashtu ai ka shkruar se në ‘Sanremo’ nuk mund të tolerohen problemet me vokalin. Megjithatë Ardit Gjebrea dukej shumë i kënaqur me skenografinë dhe regjinë e festivalit, shkruan Who. Gjebrea është një ndjekës i rregullt i ‘Sanremo’, duke qenë se prej vitesh ai drejton festivalin ‘Kënga Magjike’, i cili vit pas viti sjell risi për të arritur standardet e festivalit italian dhe jo vetëm.